काठमाडौं , वैशाख २१ गते । प्रमुख प्रतिपक्षी नेपाली काँग्रेसले सरकारको विकल्प खोज्न थालेका बेला सत्तारुढ एकीकृत नेकपा माओवादीले पनि आफूले सरकारको विकल्प खोजिरहेको बताएको छ ।
एमाओवादी सचिव वर्षमान पुनले आफूहरु प्रधानमन्त्री केपी शर्मा ओलीलाई धेरै समय काँध थापेर हिँड्ने पक्षमा नरहेको बताएका छन् ।रिपोर्टस क्लबले मंगलबार काठमाडौमा गरेको साक्षात्कारमा बोल्दै पुनले सरकारले जनताको अपेक्षा अनुसार काम गर्न नसकेको बरु सुशासन र आपूर्तिको अवस्था झनझन बिग्रँदै गएको गुनासो गरे ।प्रधानमन्त्री ओलीले आफ्नो कार्यशैली सुधार नगरे पार्टी सरकारबाट बाहिरिने पुनले बताए । उनले पार्टीको स्थायी समिति बैठकले नै सरकार पूर्णरुपमा असफल भएको निष्कर्ष निकालिसकेको तथा सरकारको विकल्प खोज्ने बारेमा प्रधानमन्त्री ओलीलाई जानकारी गराइसकेको समेत बताए ।सचिव पुनले संविधानलाई सर्वस्वीकार्य बनाउनका लागि असन्तुष्ट दलहरुसँग वार्ता गर्नुको साटो प्रधानमन्त्री ओली भाषणबाजी, भोजभतेर र शिलान्यासमा रमाएको आरोपसमेत लगाए ।पूर्वअर्थमन्त्रीसमेत रहेका पुनले प्रधानमन्त्री ओलीमाथि भूकम्प प्रभावित जनता त्रिपालमुनि बस्न बाध्य भइरहेको अवस्थामा राजा महाराजाको शैलीमा विमान चार्टर गरेर विदेश घुम्नमा रमाएको तथा मितव्ययितालाई पूरै बेवास्ता गरेको आरोप लगाए ।एमाओवादी नेता पुनले सरकारका कामकारवाही प्रभावकारी नभएको विषयमा सामूहिक छलफलका लागि पार्टीले पत्र नै लेखेर आग्रह गरेको तर प्रधानमन्त्री ओलीले पत्रको जवाफ समेत नफर्काएको रहस्य समेत खोले ।
Post a Comment